KUCHING: Sekeda parti politik rindu agi deka berebutka kuasa enti dibandingka enggau pengelantang ungkup Sarawak enggau rayat iya, pia ku Ketuai Whip Gabungan Parti Sarawak (GPS) Datuk Seri Fadillah Yusof (gambar).
Fadillah nengah penerang berita ensana madah, raban tu nadai malu nerima ‘engkatak politik’,kelimpah ari enda ngengetu bejaku pasal chara besaumka ‘reta ti dirampas’ enggau sapa ti bisi hak bulih nya dalam tuju nguasa Sarawak.
“Raban tu rindu agi berebutka kuasa entara pangan diri enti dibandingka enggau pengelantang ungkup Sarawak enggau rayat.
“Nya nyata dipeda nengah penerang Presiden Parti Sarawak Bersatu (PSB) Wong Soon Koh bedau lama udah ti ngerara sereta ngemaruhka ketuai Parti Tindakan Demokratik (DAP) Sarawak, Chong Chieng Jen enggau mayuh agi penerang ke bukai ari Parti Keadilan Rakyat (PKR) ti ditujuka ngagai DAP bekaul enggau kerusi Kunsil Nengeri (DUN) ti dibagi ba pengawa bepilih nengri Sarawak tu ila,” ku iya.
Fadillah ke mega Menteri Kanan Kereja Raya madah, nya alai Gabungan Parti Sarawak (GPS) patut dipilih semua rayat Sarawak maya pengawa bepilih tu ila.
“GPS ke diatu mengkang komited ngemujurka juluk ati Niang Pehin Sri Adenan Satem ungkup Sarawak.
“Siti chunto pekara ti ditukuka Pehin Sri Adenan begulai enggau perintah besai dalam bulan April taun 2015 iya nya, semua perengka pengangkut Sarawak nadai dipinta mayar tol enggau tambang feri.
“Diatu, kitai udah ngemujurka serata nengeri Sarawak tu nadai agi tol laban semua tol nya udah dikinsil magang dalam taun 2016,” ku iya.
Siti agi pekara ti nyata dipeda nyadi komitmen GPS ku iya, pemujur besai nembuka pengawa ngaga Jalai Besai Pan Borneo ti nadai tol ti deka mai pemansang besai, pengelantang enggau pengelikun ngagai semua rayat Sarawak.
“Taja pan ditangguh ketegal nginsil belanja ari perintah Pakatan Harapan (PH) pengudah PRU14, Sarawak tetap nadai agi begunaka feri manggai ba taun 2026, enti semua 11 jematan tembu digaga magang ila.
“Bedau lama udah, bisi jematan ke udah tembu digaga sereta udah tau dikena baka Jematan Batang Sadong (2016) enggau Batang Samarahan (2018),” ku iya.
Semilan iti agi jematan ke bukai mega digaga ngena belanja ari Perintah Sarawak ku iya, benung ba mayuh bengkah renggat ngaga lalu dijangka dibuka dalam timpuh empat tahun ke deka datai.
“Ba pengawa nyagai hak Sarawak enggau tanah kitai,perintah GPS mega udah meli baru tekad ai Bakun ari perintah besai dalam taun 2017 enggau rega ti nentuka Sarawak bulih untung besai jemah ila.
“Nya kebuah, Sarawak diatu bekuasa ba elekterik ti dipansutka kapasiti sereta mekalka ngena ungkus kediri awakka rayat Sarawak ulih ngasaika rega ke pemadu baruh enggau elekterik ti pemadu beresi di Malaysia,” ku iya.
“Aram mih kitai ngemujurka juluk ati kitai ungkup Sarawak. Anang kitai nejuka diri dikeruga raban orang charut sereta pambar, enda sikar, semina deka berebutka kuasa tang nadai perambi ti nyata ungkup Sarawak,” ku Fadillah ke mega Kaban Parlimen Petra Jaya – Utusan Borneo