KUCHING: Ketuai Whip Gabungan Parti Sarawak (GPS) Datuk Seri Fadillah Yusof nyambut manah penemu Barisan Nasional (BN) ke enda ‘masuk champur’ ngatur enggau mantu Gabungan Parti Sarawak (GPS) ba Pengawa Bepilih Nengeri Sarawak Ke-12 (PRN 12).
Iya ti mega Naib Presiden Kanan Parti Pesaka Bumiputera Bersatu (PBB) madah BN bisi pengarap ngagai GPS ulih ngatur enggau ngiring nengeri tu.
Tambah mega ku iya GPS ti bisi empat parti komponen iya nya PBB, Parti Rakyat Sarawak (PRS), Parti Demokrati Progresif enggau Parti Rakyat Bersatu Sarawak endang lama udah bebakih enggau BN.
“Kitai nyambut enggau manah, nya bela mantu sama diri ari suba, taja ukai agi enggau Barisan Nasional ari segi serakup parti tang ketegal pengeransing sama besaup.
“Nambah nya sida nemu ba Sarawak tu endang GPS lebih agi ulih ngiring ba Sarawak.
“Nya kebuah sida nyukung GPS, ngambika terus ngiring Sarawak sereta sida meri pengarap penuh ngagai GPS,” ku iya.
Kaban Parlimen Petra Jaya meri penemu iya lebuh dikerandau pekara nya pengudah ngulu Program Sepakat @Komuniti Keluarga Malaysia Renggat Bagi Menua Kuching ti diatur Opis Pemadah Nengeri Sarawak ba Dewan Haji Kamaruddin Kampung Segedup, Batu Kawah ditu, kemari.
Kelimpah ari nya lebuh ditanya bekaul enggau pengandal iya pasal chalun GPS ba Kunsil Nengeri (DUN) Satok, Fadillah madahka Datuk Ibrahim iya nya Sapit Ketuai Pampang tauka Sapit ngagai Datuk Patinggi Tan Sri Abang Johari Tun Openg ti ke udah lama gawa tauka meri servis ba DUN Satok.
“Kitai bendar ari peneleba enggau orang udah ngelala chalun DUN Satok, chalun tu deka nerima sukung ari rayat dalam DUN tu,” ku iya ti arap bendar GPS ulih menang ba DUN Satok.
Ibrahim dichalun ba DUN Satok nganti penyandang iya Abang Johari ti nyadi chalun DUN Gedong nganti Datuk Mohd Naroden Majais ti enda ngetanka penuduk Gedong.
Lalu bekaul enggau betukar chalun ku iya pekara nya suah nyadi sekalika ketegal penyandang ngetu laban deka meri peluang ngagai orang bukai sama ngemansangka sitak.
“Ambika chunto ku iya , YAB Kepala Menteri kitai empu, laban Datuk Mohd Naroden Majais nyurut sereta enda ngetanka penuduk lalu deka ke Kepala Menteri kitai ngarika Gedong.
“Laban Kepala Menteri nyadi pengari ba menua pesisir tu, ngayanka fokus pemansang menua pesisir deka lebih dikemekuhka.
“Nya engka pesan(mesej). Labi sekeda orang madah YAB Kepala Menteri kitai semina ngarika Kuching aja, tang kebendar enda tu ditunjukka iya nya iya sanggup ngelawa di menua pesisir.